1Th 2 | MCQ | STEP | Vwehu núne ja ojono nihena kavu. Nú joni vu'ajaho nú núni vea panisame vu'ara.

1 Thessalonians 2

Porura Kaukara Ka'ene Tesaronia Venajina

1 Vwehu núne ja ojono nihena kavu. Nú joni vu'ajaho nú núni vea panisame vu'ara. 2 Ja niheja ja'ina'e nú nimarako Piripai sise'i 'ahúume haha hianumana kaivo nú núni Godijihuni vaji harura ape'ika'i ja Godoni vu'a maiu'ina ijí ninakaraa renana vajijaho 'waravara. 3 Núra ja 'waravajaho puruvare'e 'warahuna pana 'ee 'unama siseijino 'warahuna pana 'ee pisivisame 'warahuna pana. 4 'Enakaivo Godira nú nimaa vetúarena Huni vu'a maa maiu'inakaho múhana'omo nú emaa teamanahuna'e vehuna pana kaivo Godira núni ojijaho nivena kúmana. 5 Ja niheju ja'ina'e nú ira toa vene 'warahuna pana 'ee joni uneunecha 'eka'irono pisivihuna pana. Ijihuni maijaho Godiho núni vu'a nimaa vetúu. 6 'Ene emaa 'ee jaa 'ee ea 'aho pu'úmo nú ta'aroru'avarono avahuna pana. Nú Keriso oni apasorua'omo nú núni harurijino vehune sa'ina 7 kaivo nú masuani ajuarasahe joni vaji hijara areri oahi huni sesamaa'e 'ajohau ja'ina'e vejara. 8 Nú ja niho'o oja miha paraja jihuna'e nú Godoni vu'a maiu'inijiru pamihara kaivo nú niho'o ura renua para'eme núni hia 'u'o ja vajihara. 9 Vwehu núne ja mavwihaha. Nú joni vaji hijari veijaho nú ja ahija mihuna senuvume nú onúno harura vene na'ia veiri'a kaukara veji'i Godoni vu'a maa maiu'ina ja 'waravara. 10 Godiho nú nihena kúme nimaa veju'e ja 'u'o nimaa veju. Núra ichá'ina'e ja pu'úmo akume 'ee arimaa'e hine 'ee unenu 'aho'a ea 'aho'a panamuhe 'waru'eme nú nimaa roji'ina pu'úmo hami hijura. 11 Ja niheju núra ichá'ina ka'ene ni'ajihe 'ee ta'arorahe 'ee hine hami nirisame ea kwinu kwino areri omahi sesahwaha'e 'waramu ja'ina'e nú hine ja 'waravara. 12 Ijihuna'e Godi ka'ene ja 'umenau'e Huni ara 'ee hanaji'inijino vahuna 'iamajihuni 'unama ka'ene Hura kive areri rehunijino o'avara. 13 Ikehuni hahi nú 'u'o na'ia mapoka'e Godi teimani 'wavura. Ja vea ka'ene Godoni ira ike núnuna'i apejari veijaho ja emaapuni ira puna'a paapejara kaivo ja Godoni ira nimaa'e apeju ja'ina'e apejara. Ijihuna'e ja ea irara ijí ira kaji nimaa ronujaho joni vaja 'u'o kaukara venu. 14 'Enajihuna'e vwehu núne Godoni sosia ka'ene Jesu Keriso oni vaji Jutia namijujipo vejaja'ina'e ja vejara. Ja ehu jopuna'i sisea ichá'ina ka'ene piuniva ja'ina'e pu 'u'o Jua puna'i sisea ija'ina'e piunivara vo kirasahara. 15 Pu Natohwa Jesu 'anae 'ee poropetia 'ania ja'ina'e nú 'u'o 'ararihúume usevara. 'Enajihuna'e pu Godira ura renuja'ina pavene 'ee emaapuni nana'eji'ina'e rejara. 16 Jenitarupo Godi nimaa rohuni jihuna'e pu tanu'uruhu'e nú vu'a pa'waravura. Ijihuni hahi pu puni siseijaho veju'e tiresa hina apena ajimu. 'Enakaivo puni eha siseijaho niroe areri rena parana namu.

Porura Tesaronia Kú'o 'Unama Va'e Ki'iro Vwihanajina

17 'Enakaivo vwehu núne nú ja hahijino ma'uako irechamie va'ara kaivo núni ojijaho ijí ja pu'úmo navu. 'Ene núni ura ijaho roe joni urania kihuna'e ura renua paranúu. 18 Ijihuni maijaho nú roe ja kihuna'e ura renu 'ee na Poru na'ia mapoka'e roe ja kihuna'e ura reniu kaivo Setanira hine roturúhu. 19 Núni nimaa roijaho irahije 'ee núni eha maa ka'ene núa'e ta'aroruhe vajúhunijaho irahije? Núni Natohwa Jesura ro'amani veijino jara Huni una'i namihunijina. 20 Ijihuni maijaho ja núni pinana mamaijina 'ee temarijina.